Mappa del Sito
Home Page
Inizio Pagina
Pagina Precedente
       
‘Na volta l’era usantha che a Pascua i santui ‘i portàs ai fioth, oltre che ‘na fugatha fata in ciasa, ància, secondo le possibilità, una diesena de vòf lès colorath. Infati la tradithiòn la voleva che in ogni ciàsa le femene le coloràs i vòf de pita, pà dai al color ala scolfa le dopràva: scorthe de thegole pa fali deventa rossi, ortie pa fali deventà verdi e fondi de cafè pa fali deventà maron. Ma stì vòf nò ‘i vigneva magnadi duth, qualchedùn al vigneva tignut da banda pa podè fà al duio del “tiro al vòf”. Come se fevèlo stò duio? Dopo messa granda o prima e dopo bespre del dopomesdì, i dovins, ma ancia i canais e qualche vecio, ‘i se meteva o intei cortìfs o in te le crosere o ància in platha vesin al cianpanile, ‘i poiava tacàt a un mùr tre - cuatro vòfs, a secondo de chi che doveva duià, e dopo, metendòse a ‘na therta distantha, co un scheo ‘i thercava da centrà un vòf. De solito i schei che i vigneva doprath l’era schei veci fora corso, e parchè che i podès implantasse ‘ntei vòfs, cualchedùn co ‘na lima i feva deventà pì fins e pì taienti. Cùan che ùn al riussiva a implantà al scheo in tel vòf, se dopo avè dat tre colpi in dò, al scheo nol se stacava, stò ca al podeva magnasselo. Therti àni l’era cualchedùn che l’aveva cussì tanta o fortuna o bravura che al centrava tains vòfs, e cussì in te ‘na dornada al magnava pì vòfs che in te dut al rest de l’àn! Erèlo o no erèlo bei tempi? L’era sodisfathiòn vince e magnà un vòf, al dì de uncùoi nessun pitura pì i vòf e tanto manco i santui ‘i li porta ai fioth, nessun tira pì ai vòf, ma se cualchedùn l’avès un poc de bona volontà al podarave tornà a fà stò duio che, a Pascua, fin a nò tanti àni fà, al feva passà cualche ora in legrìa a grains e pithui.... Decidèit voi, e se ve pensèit duièit!!!!
       
       
 




























































Loading