Settembre 2005, da Pippo, ora dell’aperitivo. Presenti Gigi Basso, Massimo Zardo e Mauro Zambon Pala.
Ciao Mauro, lo cognosseto chel sora el mus?
- Fame vede sta foto … dai … ma soi mi! Dunlà l’ato ciatada sta foto? L’e stada forse l’ultima volta che avon fat la corsa dei mus. Me pense che no l’era pi tanti che aveva el mus a Dardac, to barba Paolo Basso, Gigi Luthol, Iilario Fuser e poci altri. Mi soi dut via de Savino, vardelo là te la foto come che el cor. El me à dat el mus e me soi presentath in platha pa la corsa, mi ere un canai, e fin che spetave a le rivat Cencio Zambon “marin” co so nevodo Primo e i me à dita:
- Ti speta cà, nino , che penson nealtre al mus – e i l’à portat dentro el portel de la cooperativa. Dopo un poc soi dut a vede chè che i feva. I era là che i deva da mangià al mus pagnoche bagnade de vin!
Cuan che l’è vignut el momento de partì, duth i mus i e partidi fora che el mio, chel se à indoneglat par tera e nol voleva pì movesse. A fortha de preme e tirà a l’è partit, ma el pareva cioc, el ciaminava stort e fin dopo la crosera pareva che l’avesse da fermasse ogni momento. Cuan che son rivadi in Via Tarabin al se à come rianimat e a l’è partit al galoppo do pa la discesa fin in platha e nol se à pi fermat: al’à passat el traguardo e l’à continuat a core fin a Ciastel.